निकै नै रोमाञ्चक खेलमा बुटवल ब्लास्टर्ससँग सुपर ओभरमा पराजित भएपछि ज्ञानेन्द्र मल्लको काठमाडौं गोल्डेन वारियर्सले पोखरा प्रिमियर लिगमा लगातार दोश्रो पराजय बेहोरेको छ ।
पोखरा क्रिकेट मैदानमा एकपटक फेरि लामो ब्याटिङ्ग लाइन अपले खासै राम्रो प्रदर्शन गर्न नसक्दा काठमाडौलाई पवन शर्राफले २१ बलमा नटआउट ३७ रन बनाएपछि ६ विकेटको क्षतिमा १ सय ४० रन बनाएको थियो । जवाफमा बुटवलले हर्श टंकको ४५ र शिभम सिँहको आक्रमक ३३ रन बनाएपनि ब्लास्टर्स ६ विकेटको क्षतिमा १ सय ४० रनमै रोकिएको थियो ।
सुबोध भाटीले लिएर आएको सुपर ओभरमा आदिल खान र बसन्त रेग्मीले उत्कृष्ट फिल्डिङ्ग गर्दै वाइडिस थर्ड म्यानमा दुई वटा छक्का बचाएपछि बुटवलले १२ रन बनायो । बुटवलका लागि अविनास बोहोराले एक ओभरमा मात्र दुई रन खर्चिएपछि काठमाडौं पराजित हुन पुग्यो ।
सुपर ओभरको पहिलो बलमा काठमाडौंले रन बटुल्न सकेन । दोश्रो बलमा गौरभ तोमरले दुई रन बटुलेपनि तेश्रो बलमा मिड विकेटमा क्याच थमाएका थिए । स्ट्राइकमा आएका भाटीलाई अविनासले एक रन पनि नदिएपछि बुटवलले जित आफ्नो नाम गराएको थियो ।
अन्तिम ६ बलमा ९ रन चाहिएको स्थितिमा पवन शर्राफले फालेको ओभरमा शिभमले पहिलो तीन बलमा एक–एक रन लिने स्थितिमा पनि अर्को एण्डमा रहेका बिपिन खत्रीलाई फर्काएका थिए । चौथो बल वाइड भएपछि बुटवललाई तीन बलमा ८ रनको आवश्कता थियो ।
चौथो बलमा शिभमले छक्का प्रहार गर्दै पाचौंमा एक रन लिएपछि स्कोर बराबर भएको थियो । अन्तिम बलमा पवनले बिपिनलाई जयकिशन कोल्सावालाको हातबाट स्टम्पिङ्ग गराए पछि खेल सुपर ओभरमा गएको थियो ।
शिवम ३३ रनमा नटआउट रहे । उनले २१ बलमा तीन छक्का र दुई चौका प्रहार गरेका थिए । काठमाडौंलाई खेलमा फर्काउने काम भने सुबोध भाटीले गरेका थिए । अन्तिम १२ बलमा १० रन चाहिएको स्थितिमा भाटीले १९ ओभरमा सोमपाल कामी (११) र हरि बहादुर चौहानको विकेट लिदै मात्र एक रन खर्चिएका थिए ।
माथिल्लो अर्डरका ब्याट्स्म्यानहरुले उल्लेखनीय योगदान गरेपछि बुटवल खेलमा शुरु देखि नै कायम रहेको थियो । उसका लागि हर्श टंकले २९ बलमा ४५ रन प्रहार गरे । उनले तीन छक्का र तीन चौका प्रहार गरे । टंकले तेश्रो विकेटका लागि भिम सार्की (१३) सँग ४० रनको साझेदारी गरेका थिए । त्यसपछि बुटवलको इनिङ्गसलाई शिभमले सम्हालेका थिए ।
यसअघि टस हारि पहिलो ब्याटिङ्ग गरेको काठमाडौंले २० ओभरमा ६ विकेट गुमाउदै एक सय ४० रन बनायो । ओपनरद्वय कोल्सावाला र सुबाष खकुरेल (१५) ले पहिलो विकेटका लागि ३८ रन जोड्दै काठमाडौंलाई सन्तोषजनक शुरुवात दिलाएका थिए ।
तर बुटवलले उत्कृष्ट फिल्डिङ्ग गर्दै १२ रनको अन्तरमा तीन विकेट लिएपछि काठमाडौं दवाबमा आयो । ज्ञानेन्द्र (१५) र आदिल खानले ३५ रनको साझेदारी गर्दै काठमाडौंलाई १ सय रन नजिक पु¥याएका थिए ।
फ्राञ्चाइज क्रिकेटमा पहिलो खेल खलिरहेका बाया हाते स्पिनर नितेश थापाले तीन बलको अन्तरमा ज्ञानेन्द्र र खतरनाक ब्याट्स्म्यानलाई शुन्य मै पेभिलियन फर्काएपछि बुटवल खेलमा फर्किएको थियो । आदिल खानलाई पनि अविनास बोहोराले विकेट लिएपछि काठमाडौं ८९ रनमा ६ विकेटको नाजुक स्थितिमा पुगेको थियो ।
पवनले आक्रमक ब्याटिङ्ग गर्दै सातौं विकेटका लागि अमर सिँह रौटेला (१४ नटआउट) सँग ५१ रनको साझेदारी गरेपछि काठमाडौंले चुनौतिपूर्ण योगफल खडा गरेको थियो । पवनले २१ बलमा तीन चौका र दुई छक्का सहित नटआउट ३७ रन बनाए ।
प्रिथु बास्कोटाको स्थान लिएका आदिलले १५ बलमा २३ रन बनाए । उनले एक चौका र एक छक्का प्रहार गरे । बुटवलका लागि हरि बहादुर चौहानले पनि एक विकेट लिएका थिए ।
