इटालियन क्लब नापोलीले च्याम्पियन्स लिगमा बेल्जियन क्लब गेंकलाई ४–० ले पराजित गरेको केही घण्टापछि नै आफ्ना प्रशिक्षक कार्लो एन्सलोट्टीलाई बर्खास्त गरेको छ ।
जितपछि नापोली युरोपको सबैभन्दा ठूलो क्लब प्रतियोगिताको अन्तिम १६ मा पनि प्रवेश गरेको छ । तर फराकिलो अन्तरको जितले प्रशिक्षक एन्सलोट्टीलाई भने बचाउन सकेन ।
मङ्गलबारको जितअघि एन्सलोट्टीले नापोलीलाई कुनै पनि प्रतियोगिता अन्तर्गत खेलिएका पछिल्लो ९ खेलमा जित दिलाउन असफल रहेका थिए । नापोली यो सिजन लिभरपुललाई हराउने एक मात्र टोली हो । उसले च्याम्पियन्स लिगमै डिफेण्डिङ्ग च्याम्पियन लिभरपुललाई २–० ले हराएको थियो ।
अघिल्लो महिना नापोलीका अध्यक्ष अरेलियो डे लरेन्टिससँग एन्सलोट्टी र नापोलीका खेलाडीहरुबीच राम्रै बिवाद चलेको थियो । डे लरेन्टिसले टिमलाई एक हप्ते लामो प्रशिक्षणमा जान निदेर्शन दिएपनि एन्सलोट्टी र खेलाडीहरु भने घर फर्किएका थिए ।
सन् २००९ र १० को सिजनमा चेल्सीका लागि दुई एफए कप जित्न सफल एन्सलोट्टीलाई रिक्त रहेका इङ्गलिस प्रिमियर क्लब आर्सनल र एभर्टनको ब्यवस्थापकीय पदसँग जोडिएको छ । लिभरपुल लेजेण्ड बब पाइज्ली र रियल म्याड्रिडका प्रशिक्षक जिनेदिन जिदानसँगै तीन च्याम्पियन्स लिग जित्ने एन्सलोट्टी तीन मध्येका एक प्रशिक्षक हुन् ।
उनले एसि मिलानसँग दुई र रियलसँग एक च्याम्पियन्स लिग उपाधि जितेका छन् । उनले मिलान, चेल्सी, पिएसजी र बायर्न म्युनिखसँग घरेलु लिगका उपाधिहरु प्नि जितेका छन् ।
