१३औं दक्षिण एसियाली खेलकुद (साग) अन्तर्गत पुरुष फुटबलको पहिलो खेलमा भुटान बिरुद्ध सानदार जीत दर्ता गराएको नेपालले आफ्नो दोश्रो खेलमा आज श्रीलंकाको सामना गर्दैछ । खेल नेपाली समय अनुसार साँझ ५:०० शुरु हुनेछ ।
सन् २०१५ को महाभुकम्प पछि नेपालले पहिलो पटक फ्लड लाइटमा खेल खेल्न लागेको हो । चार वर्ष दशरथ रंगशालामा कुनै पनि खेल हुन सकेको थिएन ।
साग फुटबलको साबिक बिजेता नेपालले हिजो भुटानलाई ४-० को फराकिलो अन्तरले पराजित गरेको थियो । नेपालको जीतमा कप्तान सुजल श्रेष्ठले दुई तथा अविशेक रिजाल र मिक्चेन तामांगले समान १-१ गोल गरेका थिए ।
खेल शुरु भएको पाँचौं मिनेटमा नेपालले पहिलो गोल गरेको थियो भने त्यस पछि पाएको अवसर सदुपयोग गर्न नसक्दा पहिलो हाफ १-० मा सकिएको थियो । दोश्रो हाफमा नेपालले तीन गोल थप्न सकेपछि नेपालले ४-० ले जीतेको थियो ।
श्रीलंकाले पनि यस अघि एक खेल खेलेको छ भने जीत निकाल्न सकेको छैन । माल्दिभ्ससँगको खेल गोल रहित बराबरीमा सकिएको थियो ।