१३ औं दक्षिण एसियाली खेलकुदको पुरुष क्रिकेटका लागि बलियो टिमको घोषणा गरेको बङ्गलादेशका कप्तान नाजमुल होसेन सान्टोले आफ्नो टोलीको लक्ष्य स्वर्ण पदक रहेको बताएका छन् ।
बङ्गलादेशले शुक्रबार साँझ घोषणा गरेको टोलीमा लामो अनुभव बटुलेका सौम्य सरकारसँगै अफिफ होसेन र नइम शेख पनि रहेका छन् । २६ बर्षीय सरकार यसअघि बङ्गलादेशमै सम्पन्न एसिसि इमर्जिङ्ग टिम्स कपमा पनि सामेल रहेका थिए । इमर्जिङ्ग टिम्सको फाइनल पुगेको बङ्गलादेश उपाधिका लागि भएको खेलमा पाकिस्तानसँग हारेको थियो ।
बङ्गलादेशले लगभग त्यही टिमलाई निरन्तरता दिएको छ । भारत र पाकिस्तानले पुरुष क्रिकेटमा सहभागिता नजनाउने भएपछि बङ्गलादेश स्वर्ण पदकको प्रबल दाबेदारको रुपमा अघि आएको छ । दक्षिण एसियाली खेलकुदमा श्रीलंकाको अण्डर २३ टिमले पनि खेल्नेछ र यसअघि नै उसले आफ्नो टिम घोषणा गरिसकेको छ ।
“हामी दक्षिण एसियाली खेलकुदमा स्वर्ण जित्ने लक्ष्य साथ गइरहेका छौं, कप्तान घोषित भएपछि सान्टोले भने । जहासम्म मलाई लाग्छ, नेपालमा अहिले निकै चिसो छ र हामीले जतिसक्दो चाडो त्यहाको मौसममा भिज्न आवश्यक छ ।”
टोलीका सबैभन्दा अनुभवी खेलाडी सरकारले बङ्गलादेशका लागि ५५ एकदिवसीय अन्तर्राष्ट्रिय, ४६ ट्वान्टी ट्वान्टी अन्तर्राष्ट्रिय र १५ टेस्ट खेलिसकेका छन् । अर्का अनुभवी खेलाडी अफिफ हुसेनले पनि ८ टेस्ट खेलेका छन् । सान्टो आफैले दुई टेस्ट र तीन एकदिवसीय खेलेका छन् ।
दक्षिण एसियाली खेलकुदमा बङ्गलादेश र श्रीलंकाको अण्डर २३ टिमसँगै आयोजक नेपाल, माल्दिभ्स र भुटानले सहभागिता जनाउने छन् । मङ्गलबारदेखि त्रिवि क्रिकेट मैदानमा शुरु हुने पुरुष क्रिकेटको उद्घाटन खेलमा नेपालले श्रीलंकाको सामना गर्नेछ । पुरुष क्रिकेटले दक्षिण एसियाली खेलकुदमा ९ बर्षपछि पुनरागमन गरेको हो । हुन त २०१० मा बङ्गलादेशमै भएको ११ औं संस्करणपछि भारतमा २०१६ मा १२ औं संस्करण सम्पन्न भएको थियो ।