नेपाली महिला भलिबल टोलीले १३ औं दक्षिण एसियाली खेलकुद अन्तर्गतको आफ्नो पहिलो खेलमा बङ्गलादेशमाथि सहज जित हात पारेको छ ।
दशरथ रँगशालास्थित कभर्ड हलमा भएको खेलमा नेपालले बङ्गलादेशलाई सोझो सेटमा पराजित गरेको हो । पहिलो दुई सेट २५–९, २५–९ ले जित्दै २–० को अग्रता लिएपछि बङ्गलादेश नेपाल सामु निरिह साबित भएको थियो । तेश्रो सेटमा पनि नेपाल २५–११ ले बिजयी भएको थियो ।
यसअघि नेपालले बङ्गलादेशमै भएको एभिसि सेन्ट्रल जोन महिला भलिबल च्याम्पियनसिपमा घरेलु टोली माथि नै सहज जित हात पारेको थियो ।
दक्षिण एसियाली खेलकुद आइतबार औपचारिक रुपमा शुरु हुने भएपनि भलिबलका खेलहरु पहिले नै शुरु भएका हुन् । आजै साँझ नेपाली पुरुष टोलीले बङ्गलादेशबिरुद्ध नै खेल्दैछ ।
दक्षिण एसियाली खेलकुदमा कुल २८ खेल हुनेछन् । नेपालले सबै खेलमा सहभागिता जनाएको छ ।