दक्षिण अफ्रिकाले दिएको १५० रनको लक्ष्य लिएर ब्याटिंगमा आएको भारतले १९ ओभर खेल्दै तीन विकेटको नोक्सानीमा जीत दर्ता गरायो ।
भारतको जीतमा कप्तान कोहलीले अविजित रहँदै सर्वाधिक ७२ रन बनाए । खेलको म्यान अफ द म्याच घोषित कोहलीले ५२ बलको सामना गर्दै चार चौका र तीन छक्का प्रहार गरे । कोहली बाहेक ओपनरद्वय शिखर धवन र रोहित शर्माले क्रमसः ३१ बलमा ४० रन तथा १२ बलमा १२ रन प्रहार गरे भने श्रेयस ऐयेरले पनि अविजित रहँदै १४ बलमा १६ रनको योगदान दिए ।
यस अघि मोहालीमा भएको खेलमा पाहुना टोली दक्षिण अफ्रिकाले कप्तान क्विन्टन डि ककको अर्ध शतकको मद्धतमा २० ओभर खेल्दै १४९ रनको मध्यम योगफल खडा गर्यो ।
दक्षिण अफ्रिकाको लागि ओपनिंगमा आएका कप्तान डि ककले सर्वाधिक ५२ रन बनाए । आक्रमक पारी खेल्ने क्रममा ३७ बलको सामना गर्दै आठ चौका प्रहार गरे । पहिलो विकेटका रुपमा रेजा हेनरिक्सलाई छ रनमा गुमाएको दक्षिण अफ्रिकाको पारी सम्हाल्ने क्रममा डि ककले दोश्रो विकेटका लागि ४९ बलमा ४९ रन बनाएका टेम्बा बभुमासँग मिलेर ५७ रनको शाझेदारी गरे ।
दक्षिण अफ्रिकालाई सस्तैमा समेट्ने क्रममा दिपक चाहारले चार ओभर बलिंग गर्दै मात्र २२ रन खर्चिएर सर्वाधिक दुई विकेट लिए ।
अब भारत र दक्षिण अफ्रिका बिच तीन खेलको शृंखला अन्तर्गत तेश्रो तथा अन्तिम खेल असोज पाँच गते बेंगलुरुमा हुनेछ ।
