जिम्बाब्वे र अफगानिस्तान पहिलो पटक टेस्टमा एक आपससँग भिड्दै छन् । अफगानिस्तान र जिम्बाब्वे बीचको दुई खेलको टेस्ट शृंखला आजबाट शेख जायद क्रिकेट रंगशाला, आबु धाबीमा सुरु हुँदैछ । खेल नेपाली समय अनुसार बिहान ११:१५ बजे सुरु हुनेछ ।

यस अघि एकदिवसीय खेलमा २५ पटक र ट्वान्टी ट्वान्टी अन्तर्राष्ट्रिय खेलमा नौं पटक भिडेको भए पनि जिम्बाब्वे र अफगानिस्तान पहिलो पटक टेस्टमा खेल्न लागेका हुन् । एकदिवसीयमा अफगानिस्तानले नौं वटा र ट्वान्टी ट्वान्टीमा आठ वटा खेलमा जित हात पारेको थियो । .

टेस्ट मान्यता राष्ट्र भए पछि अफगानिस्तान आफ्नो पाँचौं खेल खेल्न लागेको हो । सन् २०१८ को जुनमा भारत विरुद्ध पहिलो टेस्ट खेलेको अफगानिस्तानले पछिल्लो पटक सन् २०१९ को नोभेम्बरमा टेस्ट खेलेको थियो । जिम्बाब्वेले भने कोरोनाका कारण खेलकुद गतिविधि ठप्प हुनु अघि श्रीलंकासँग घरेलु मैदानमा टेस्ट खेलेको थियो ।

दुई दिनमा नै सकिएको आफ्नो पहिलो खेलमा भारतसँग एक पारी र २६२ रनले पराजित भएको अफगानिस्तानले दोश्रो र तेश्रो खेलमा लगातार आयरल्याण्डलाई सात विकेट र बंगलादेशलाई २२४ रनले पराजित गर्न सफल भएको थियो । त्यस्तै उसले पछिल्लो पटक खेलेको टेस्टमा वेस्ट इन्डिजसँग नौं विकेटले पराजित हुन पुगेको थियो ।

राष्ट्रिय टोलीका कप्तान तथा गोलरक्षक किरण चेम्जोङले राम्रो प्रदर्शन गरे पछि राउण्डग्लास पन्जाबले इन्डियन सुपर लिग (आईएसएल) मा नेरोका एफसीलाई १-० गोल अन्तरले पराजित गरेको।

पन्जाबको जितमा सेनेगलका पापा बाबाकार डेवाराको गोल गर्दै आफ्नो टोलीलाई पाँचौं जित दिलाएका हुन् । डेवाराले ६५ औं मिनेटमा जोसेफा बेटियाको पासमा निर्णायक गोल गरेका थिए ।

पन्जाबका लागि छैठौं क्लिनशीट राखेका किरण म्यान अफ दि म्याच समेत चुनिए ।

जितसँगै पन्जाब अंक तालिकाको दोस्रो स्थानमा उक्लेको छ । पन्जाबको दोस्रो स्थानमा १८ अंक रहदा शीर्षस्थानमा रहेको चर्चिल ब्रदर्शको १० खेलमा २२ अंक छ । नेरोका ८ अंकसहित अंक तालिकाको अन्तिम स्थानमा रहेको छ ।

नेपाल क्रिकेट संघ (क्यान) ले आगामी शनिबारबाट आयोजना हुने मेयर कपको लागि १५ सदस्यीय टोलीको नाम सार्वजनिक गरेको छ ।

क्यानले गत महिना काठमाडौँमा सम्पन्न प्रधानमन्त्री कप राष्ट्रिय क्रिकेट प्रतियोगिताको समुह चरणमा उत्कृस्ट प्रदर्शन गर्ने खेलाडी समेट्दै काठमाडौँ मेयर ११ को टोली निर्माण गरेको हो । मेयर कपमा सेमिफाइनल खेलेका टोलीहरु – त्रिभुवन आर्मी क्लब, एपीएफ, नेपाल पुलिस क्लब र बागमती प्रदेश तथा काठमाडौँ मेयर ११ गरेर कुल पाँच टोलीको सहभागिता रहने छ ।

काठमाडौँ मेयर ११ मा प्रदेश १ का सिद्धान्त लोहनी मात्र पर्न सफल भएका छन् भने प्रदेश २ बाट हरि शंकर साह र बिबेक यादव रहेका छन् । त्यस्तै गण्डकी प्रदेशबाट कप्तान बिपिन खत्री र १५ बर्षिय ओपनर ब्याट्सम्यान अर्जुन कुमालले अन्तिम १५ मा स्थान सुरक्षित गरेका छन् ।

लुम्बिनी प्रदेशबाट सबैभन्दा धेरै खेलाडीहरु मेयर ११ मा स्थान बनाएका छन् । लुम्बिनीका कप्तान कृष्ण कार्की, मध्यक्रमका ब्याट्सम्यान सौरभ खनाल, स्पिनरद्वय अनिल खरेल र बिक्रम भुसाल तथा ब्याट्सम्यान सन्दिप रजाईलीले पनि टोलीमा स्थान बनाउन सफल भएका छन् ।

कर्णाली प्रदेशका कप्तान रबिन्द्र जंग शाही, अनुज चुनारा र बिपिन रावल तथा सुदुर-पश्चिमबाट खडक बोहरा र नारायण जोशी रहेका छन् ।

प्रतियोगिता काठमाडौँ महानगरपालिकाको ५० लाख नगद सहयोगमा संचालन हुन लागेको हो । मेयर कप यहि फागुन २२ गतेबाट फागुन २९ गते सम्म टियु क्रिकेट मैदानमा संचालन हुनेछ । पाँच टोलीले समुह चरणमा एक अर्कासँग भिड्ने छन् भने शिर्ष स्थान हात पार्ने दुई टोलीले उपाधिका लागि प्रतिष्पर्धा गर्ने छन् ।

प्रधानमन्त्री कपको उपाधि आर्मीले उचालेको थियो । आर्मीले उपाधि चुम्ने क्रममा फाइनलमा एपीएफलाई ३३ रनले पराजित गरेको थियो ।