एकदिवसीय क्रिकेटमा शतक बनाउन जति कठिन हुन्छ त्यो भन्दा बढी गाह्रो हुन्छ ९० रनको आँकडा पुगेपछि त्यसलाई पार गर्न । भनिन्छ कति पय ब्याट्स्म्यानहरुको पहिलो पटक ९० रन पुगिसकेपछि हात खुट्टा नै काम्न थाल्छ र उनीहरु नर्भस नाइन्टीज को शिकार बन्न पुग्छन्, अर्थात शतक बनाउन बाट चुक्छन् । तर एक पटक शतक बनिसकेपछि ९० लाई शतकमा बदल्न बिस्तारै बानी बस्दै जान्छ ।

आधुनिक क्रिकेटमा भारतीय ब्याटिङ्ग लिजेण्ड सचिन तेन्दुल्करले दक्षिण अफ्रिकाबिरुद्ध भएको घरेलु श्रंखलामा २ सय रन पुरा रन बनाउदै ५० ओभरको क्रिकेटमा दोहोरो शतकको ढोका खोलेपनि शतक बनाउनु सबैको लागि निकै बिशेष हुने गर्छ । सबैभन्दा बढी नर्भस नाइन्टिजको शिकार भएका पाँच ब्याट्स्म्यानहरु को–को हुन् त ?

ज्याक कालिस (दक्षिण अफ्रिका)

सम्भवत आधुनिक क्रिकेट सर्वेश्रेष्ठ अलराउण्डरमा ज्याक कालिसको नाम पहिलो स्थानमै आउने गर्छ । तिब्र गतिको बलिङ्ग गर्दै ३८ बर्षको उमेरसम्म अन्तर्राष्ट्रिय क्रिकेटमा सकृय रहेका कालिसलाई बिश्वकै उत्कृष्ट क्रिकेट खेलाडी मान्दा केही फरक नपर्ला । कालिसको दुर्भाग्य भारतका सचिन तेन्दुल्करले रनको पहाड नै खडा गरेपछि उनी त्यसकै छायाँमा पर्न पुगे ।

कालिसले टेस्टमा ४५ र एकदिवसीयमा १७ शतक प्रहार गरेका छन् । र उनी ९० रन पार गरेपछि शतक बनाउने क्रममा ८ पटक चुकेका छन् । उनले एकदिवसीय क्रिकेटमा ४४ दशमलव ३६ को औषतमा ११ हजार ५ सय ७९ रन बनाएका छन् ।

अरविन्द डि सिल्भा (श्रीलंका)

श्रीलंकालाई १९९६ को बिश्वकप जिताउदाका प्रमुख खेलाडी डि सिल्भा रहेका थिए । बिश्वकप जितेदेखि केही बर्षसम्म श्रीलंकाले अन्तर्राष्ट्रिय क्रिकेटमा राज गर्दा डि सिल्भासँगै सनथ जयसुर्या, अर्जुना रणतुँगा र रोमेश कालुविथराना टिमको ब्याटिङ्गको केन्द्रमा हुने गर्दथे । डि सिल्भाले श्रीलंकाका लागि ३ सय ८ एकदिवसीय खेल्दै ९ हजार २ सय ८४ रन बनाएका थिए । यस क्रमामा उनले ११ शतक प्रहार गरे भने ९ पटक नर्भस नाइन्टिजको शिकार भएका थिए ।

ग्रान्ट फ्लावर (जिम्बाब्वे)

जिम्बाब्वे क्रिकेटको स्वर्ण युग चलिरहदा दुई दाजु भाईले बिश्व क्रिकेटलाई नै मनोरञ्जन दिइरहेका थिए – एण्डी र ग्रान्ट फ्लावर । ग्रान्ट फ्लावर ९० को मध्य र २००० को शुरुवाती बर्षहरुमा जिम्बाब्वेको मिडल अर्डरको खम्बाको रुपमा रहेका थिए । उनले २ सय २१ एकदिवसीय अन्तर्राष्ट्रिय खेल्दै ६ शतक सहित कुल ६ हजार ५ सय ७१ रन बनाएका थिए । नर्भस नाइन्टिजको शिकार नभएको भए उनको नाममा १५ एकदिवसीय शतक हुने थियो ।

नेथन एस्टल (न्युजिल्याण्ड)

हालका मार्टिन गप्टिल, सन्यास लिइसकेका पुर्व कप्तानद्वय ब्रेण्डन म्याक्कुलम र स्टेफन फ्लेमिङ्गसँगै न्युजिल्याण्डका उत्कृष्ट ओपनरहरुमा पर्दछन नेथन एस्टल । टेस्ट क्रिकेटमा सबैभन्दा तिब्र गतिमा दोहोरो शतक पुरा गर्ने किर्तिमान अझै पनि एस्टलकै नाममा रहेको छ । उनले २००२ मा इङ्गल्याण्डबिरुद्ध भएको घरेलु श्रंखलामा १ सय ५३ बलमै दोहोरो शतक पुरा गरेका थिए ।

एस्टलले न्युजिल्याण्डका लागि २ सय १७ एकदिवसीय अन्तर्राष्ट्रिय खेल्दै १६ शतकको मद्दतमा ७ हजार ९० रन बनाएका थिए । उनी एकदिवसीयमा ९० रन कटेपछि शतक पुरा नगरि ९ पटक आउट भएका थिए ।

सचिन तेन्दुल्कर (भारत)

सचिन एक पटक पनि नर्भस नाइन्टिजको शिकार नभएको भए उनको नाममा ६७ एकदिवसीय शतकको किर्तिमान हुने थियो । शायद कुनै पनि खेलाडी सचिनको एकदिवसीय शतकको किर्तिमान नजिक पुग्ने थिएनन् । उनको किर्तिमान नजिक भारतकै वर्तमान कप्तान विराट कोहली रहेका छन् जसको नाममा ४३ एकदिवसीय शतक रहेको छ । सचिनले ४९ एकदिवसीय शतक बनाएका छन् ।

कोहलीलाई सचिनको टेस्टको ५१ शतकको किर्तिमानका लागि भने केही कसरत गर्नु पर्ने देखिन्छ । कोहलीले २७ टेस्ट शतक बनाएका छन् भने शायद अझै ५ देखि ७ बर्ष उनी भारतीय टोलीका लागि खेल्ने नै छन् । भारतका लागि ४ सय ६३ एकदिवसीय अन्तर्राष्ट्रिय खेलेका सचिन १८ पटक ९० रनको आंकडामा आउट भएका थिए । उनले एकदिवसीयमा १८ हजार ४ सय २६ रन बनाएका छन् ।